Tamko la Serikali juu ya Uharibifu uliofanywa Uwanja wa Taifa kwenye mechi ya Yanga na Al-Ahly

 

Mkuruugenzi wa Maendeleo ya Michezo wa Wizara ya Habari, Vijana, Utamadunina Michezo Bw. Leonard Thadeo akizungumza na waandishi wa habari (hawapo pichani) kuhusu uharibifu wa Uwanja wa Taifa leo jijini Dar es Salaam.

 

Mkurugenzi wa Maendeleo ya Michezo wa Wizara ya Habari, Vijana, Utamadunina Michezo Bw. Leonard Thadeo akizungumza na waandishi wa habari kuhusu uharibufu wa miundombinu ya Uwanja wa Taifa leo jijini Dar es Salaam.Kushoto ni baadhi ya waandishi wa habari wakimsikiliza.

 

Picha ya juu na chini, baadhi ya waandishi wa habari wakimsikiliza Mkurugenzi wa Maendeleo ya Michezo Bw. Leonard Thadeo(hayupo pichani) leo jijini Dar es Salaam alipokutana nao kuzungumzia uharibifu wa miundombinu katika Uwanja wa Taifa.

Picha na Frank Shija - WHVUM

TAARIFA KWA VYOMBO VYA HABARI

MCHEZO KATI YA TIMU YA YANGA YA TANZANIA NA EL-AHLY YA EGYPT ULIFANYIKA KWENYE UWANJA WA TAIFA SIKU YA JUMAMOSI TAREHE 01 MACHI, 2014.  WAKATI WA MCHEZO HUO, KULITOKEA VURUGU KUBWA ZILIZOFANYWA NA WATAZAMAJI AMBAPO BAADHI YAO WALING’OA VITI NA KUSABABISHA UHARIBIFU MKUBWA.  KATIKA VURUGU HIZO, VITI 10 VILING’OLEWA NA KUTUPWA NA ZAIDI YA VITI 40 VILIHARIBIWA.

SERIKALI IMESIKITISHWA SANA NA TUKIO HILI NA HASA KWA KUZINGATIA JITIHADA KUBWA ZILIZOFANYWA KUHAKIKISHA KUWA NCHI YETU INAKUWA NA VIWANJA VIZURI NA VYA KISASA NA HIVYO KUTOA FURSA KWA WANANCHI WAKE KUCHEZA NA KUPATA BURUDANI KATIKA VIWANJA BORA VYA KISASA NA SALAMA.

WIZARA IMEIELEKEZA TFF KUCHUKUA HATUA KALI KWA WOTE WATAKAOBAINIKA KUHUSIKA NA VURUGU HIZO NA KWA KUZINGATIA TARATIBU ZOTE.

TFF IMEPEWA MAELEKEZO HAYO KUTOKANA NA UKWELI WAO NDIO WASIMAMIZI WA MCHEZO HUO NA NDIO WALIOOMBA KUTUMIA UWANJA.

KIMSINGI, ENDAPO MATUKIO HAYO HAYATAKOMESHWA SERIKALI ITALAZIMIKA KUCHUKUA HATUA KALI ZAIDI.  IFAHAMIKE KUWA UWANJA NI MALI YA WATANZANIA WOTE NA HIVYO NI WAJIBU WA KILA MMOJA WETU KUULINDA NA KUUTUNZA KWA MANUFAA YA MAENDELEO YA MICHEZO NCHINI.

KWA JUMLA, WIZARA HAITAVUMULIA UHARIBIFU HUO KUENDELEA.  TUSINGEPENDA KUFIKIA HATUA YA KURUHUSU UWANJA KUTUMIKA BILA WATAZAMAJI AU KUZUIA BAADHI YA MICHEZO KUFANYIKA HAPO KAMA INAVYOTOKEA KATIKA NCHI NYINGINE.  NI VEMA TUKAENDELEZA USTAARABU WETU NA KUWA WAUNGWANA KILA TUNAPOKUWA UWANJANI KUZISHANGILIA TIMU ZETU.

WIZARA YA HABARI, VIJANA, UTAMADUNI NA MICHEZO